Quatter chantuns da la Svizra Orientala introduceschan in pli vast obligatori da purtar mascrina. En il chantun Son Gagl valan las novas reglas davent da damaun, en la Turgovia ed en ils dus chantuns d'Appenzell davent da venderdi. Pertutgads èn concerts ed autras occurrenzas endadens ed en il liber, kinos, teaters, fieras e martgads, ospitals, chasas da tgira e d'attempads e fermadas dal traffic public.
Il Son Gagl è anc pli strentg, là vala l'obligatori da purtar mascrina per tut ils spazis endadens ch'èn publicamain accessibels. L'obligatori vala per tuttas persunas davent da 12 onns e saja independenta dal obligatori da certificat.
Plinavant appelleschan las quatter regenzas a las interpresas da puspè introducir homeoffice, sche pussaivel. La populaziun duai puspè sa tegnair meglier vid las recumandaziuns d'igiena. Concret, lavar e dischinfectar ils mauns, ventilar e tegnair distanza.
Situaziun precara er en Europa
La situaziun sa pegiurescha er tar ils blers vischins da la Svizra. Sulet en l'Austria vesan ins gia l'effect dal lockdown e che las infecziuns sa reduceschan puspè.
