Dus departaments discutian cun il Comité internaziunal da la Crusch Cotschna, l'IKRK, las sfidas actualas e futuras, quai che pertutga las finanzas citescha la «Sonntags-Zeitung» il Departament federal d'affars exteriurs. In aspect saja la dumonda sche l'organisaziun stoppia pajar enavos in emprest da Covid, da 200 milliuns francs. La Svizra è il terz-impurtant finanziader da l'IKRK. L'onn passà ha l'agid muntà a 166 milliuns francs. L'organisaziun staziunada a Genevra ha dà enconuschent avant curt da stuair spargnar 400 milliuns francs. Sin l'entir mund perda bunamain mintga 10avel emploià u emploiada sia plazza – 26 dals 350 posts da l'IKRK vegnan serrads ed ulteriurs redimensiunads. Problems ha l'IKRK survegnì perquai ch'i n'han betg pudì garantir l'entir budget da 2,8 milliardas francs per l'onn actual. La Crusch Cotschna patescha da las sfidas economicas globalas. Igl ha da pli paucas annunzias da donaziuns. Radund 90% dals daners da l'IKRK vegnan da pajais. Pervi da l'inflaziun èn era las expensas s'augmentadas pli fitg che spetgà la fin dal 2022.
L'IKRK vul sa concentrar sin sias activitads principalas e sin las regiuns cun ils pli gronds basegns. Tar questas tutgan l'Ucraina, l'Etiopia, il Jemen, la zona da Sahel, il Sudan e la Siria. En general dettia dapli cumbats e guerras, che cuzzian er pli ditg. Sin l'entir mund sajan quai passa 100. Era dettia adina dapli catastrofas ecologicas, pervi da la midada dal clima