Raschun principala per ils problems saja il dumber grond da projects d'informatica che l'armada stoppia dar dumogn per il mument. Quai ha confermà il pledader da l'armada Stefan Hofer en in rapport da las gasettas da la Tamedia.
Ins haja gia l'atun 2020 sentì ch'i dettia stretgas tar ils custs per l'informatica. La dimensiun saja dentant pir vegnida clera durant l'onn current. Il preventiv d'informatica da quest onn vegnia surpassà per radund 100 milliuns francs, declera Hofer. Previs eran 460 milliuns francs.
Dapli persunal
Plinavant duvrassi radund 400 plazzas cumplainas per dumagnar tut ils projects d'informatica che stuessan vegnir realisads. Il schef d'armada, Thomas Süssli ha dentant a disposiziun be radund 100 plazzas cumplainas. Las plazzas vidas stoppian ins uss occupar cun informatichers externs cun ils custs che sa resultian suenter.
Sviar custs e franar projects
Hofer ha vinavant confermà ch'il schef d'armada veglia franar las expensas tant sco pussaivel, cun spargnar en auters lieus. Uschia vegnian spargnads radund 60 milliuns francs tar la cumpra da muniziun ed auter material da reserva. Las reservas da muniziun possian lura in auter onn puspè vegnir emplenidas. Ulteriurs 40 milliuns francs veglian ins spargnar cun franar projects d'informatica planisads.
Ord l'archiv da SRF:
Avant dus onns, ha Viola Amherd vulì augmentar il budget da l'armada.
