Siglir tar il cuntegn

Header

cuntegn

Spazi Schengen Cussegl naziunal refusa participaziun a banca da datas

La Chombra gronda refusa la participaziun da la Svizra a la banca da datas schlargiada da Schengen SIS. Las vuschs cunter quest project èn vegnidas da la PPS, PS e dals Verds. Las fracziuns han dentant gì differents arguments.

Per la PPS gieva da principi per betg surpigliar il dretg da l'UE. Medemamain vuleva la partida evitar che la directiva da l'UE avess gì influenza sin eventualas pronunzias d'exiliaziun.

La sanestra percunter ha crititgà ch'il dretg dad esters fiss vegnì pli sever cun acceptar la participaziun a la banca da datas. Ultra da quai èn er vegnids numnads dubis, schebain la SIS schlargiada portia dapli segirezza.

Cumbatter meglier il terrorissem

Schlargiada vegn la banca da datas da Schengen per pudair cumbatter meglier il terrorissem ed uschia augmentar la segirezza en il spazi Schengen. Per identifitgar persunas pon uschia ulteriuras datas biometricas vegnir registradas.

Sco pajais da Schengen è la Svizra atgnamain obligada da surpigliar il nov dretg da la UE. En il cas extrem smanatscha a la Svizra l'exclusiun ord la collavuraziun da Schengen/Dublin.

Il project va uss anc ina giada en il Cussegl dals chantuns.

RTR novitads 17:00

Artitgels legids il pli savens

Scrollar a sanestra Scrollar a dretga