I sa tractia d'ina procedura penala pervi dal suspect d'administraziun malfidaivla d'in uffizi, uschia hai num en ina communicaziun. L'inquisiziun sa drizza vers nunenconuschent, ils tschintg cussegliers da la citad sajan l'emprim sulet infurmants. La damaun han ils investigaders intercurì ils biros dals cussegliers da la citad.
42'000 francs spesas
La controlla da finanzas da Genevra aveva chattà ier en in'examinaziun spesas che n'han nagin connex cun l'activitad professiunala dals cussegliers da la citad. Il rapport da controlla ch'era vegnì publitgà il 1. da november crititgescha il pli fitg Guillaume Barazzone (PCD) ch'è dapi il 2012 en il cussegl da la citad da Genevra.
Barazzone haja inditgà spesas en valita 42'000 francs. Quai saja la pli auta summa d'in commember en la executiva. Ina summa da 17'000 francs pertutgia custs da telefonin. Ultra da quai haja Barazzone ed er Esther Alder (Verds) duvrà mintgamai passa 100 giadas in taxi, savens tar adressas privatas e durant la notg. Tranter las spesas tutgan er tschainas en lieus turistics en l'exteriur, bavrondas alcoholicas ed ina buttiglia da schampagner preziusa.
Naginas reglas cleras – nagina controllas
La curt dals quints crititgescha che la citad da Genevra na reglescha betg cler tge custs che tutgan tar la professiun e tgenins betg. Ultra da quai na vegnian las spesas er betg controlladas a moda fundada. Quai scriva l'agentura da novitads SDA.
RR novitads 14:00