A lur proxima radunanza generala ston ils uvestgs decider davart ina proposta severa. Lavurà ora quella ha in gremi d'experts davart abus sexual en il conturn da la baselgia.
Previs è che tuttas persunas che vulan lavurar en servetsch da la baselgia ston mussar in extract dal register penal cura ch'els s'annunzian.
Tar questa proposta vai per candidatas e candidats per il servetsch sacerdotal sco era per plevons che vulan midar lur plazza.
In cas sco a Riehen na duai mai pli dar
Tuttina sch'insatgi entra da nov en ina claustra u sch'insatgi mida ina plazza entaifer la baselgia catolica – en avegnir ston ins mussar tiers in extract dal register penal. Il president dal gremi d'experts, Toni Brühlmann è persvas ch'ins po evitar uschia in ulteriur «cas Riehen».
«La renfatscha è stada blers onns ch'i na vegn betg controllà bain avunda e ch'infurmaziuns na vegnan betg dadas enavant», uschia Brühlmann. Fin favrer decida la conferenza dals uvestgs svizzers davart la proposta. Brühlmann è persvadì ch'ils uvestgs vegnan ad approvar questa mesira en il cumbat cunter l'abus sexual en la baselgia catolica.
RR novitads 08:00