Il patriarc da la baselgia russ-ortodoxa, Kyrill, è stà in spiun. Ils onns 1970 haja el spiunà per il servetsch secret russ KGB en Svizra. Quai rapporta la «SonntagsZeitung». La gasetta haja examinà il dossier che la Polizia federala aveva da lez temp fatg davart il parsura da la baselgia russ-ortodoxa.
Sco represchentant dal cussegl ecumenic mundial a Genevra saja stà sia incumbensa da rimnar infurmaziuns davart auters commembers dal cussegl e d’influenzar la posiziun dals Stadis Unids e da la Nato envers l’Uniun sovietica. Fin uss haja Kyrill visità 43 giadas la Svizra.
Nagin commentari
Ni Kyrill ni la baselgia russ-ortodoxa han prendì posiziun en chaussa ed il cussegl ecumenic mundial n’haja nagina enconuschientscha da questas pretaisas. Tenor il nev da Kyrill n'è ses aug betg stà in spiun dal KGB da lez temp, dentant vegnì controllà dal servetsch secret a moda rigurusa.
Confident da Putin
Il patriarc Kyrill vala sco confident dal president russ Wladimir Putin. El sustegna er l'invasiun da la Russia en l'Ucraina ed ha dà sia benedicziun persuenter. Questa tenuta chaschuna irritaziuns e malchapientscha er ordaifer l'ecumena.
Or da l'archiv
