Siglir tar il cuntegn

Header

cuntegn

Sport d'enviern Prevegnir accidents sin pista entras ina app

Mintga onn datti en Svizra 76'000 accidents da sport d'enviern. L'app «Slope Track» da la Suva duai per l'ina sensibilisar skiunzas e snowboardists per privels sin pista e dar tips co megliurar cundiziun e fitness per esser pront per la pista.

Accidents sin pista chaschunan betg be ruttadiras, squassadas dal tscharvè ed autras blessuras mabain er custs. L'onn passà ha la Suva pajà bunamain 300 milliuns francs per accidents da sport d'enviern. L'app «Slope Track» duai prevegnir bain inqual da quels accidents. Ella registrescha numnadamain cun agid dals sensurs dal telefonin co ina persuna va cun skis ni aissa. Cun agid da quellas datas quinta l'applicaziun tge forzas che smatgan sin il corp. Tenor Samuli Aegerter, expert da sport d'enviern da la Suva saja quai tgunsch pussaivel che forzas da 2g smatgan sin il corp durant i cun skis. Quai munta il dubel da la paisa dal corp – tar ina persuna da 60 kilos fissan quai 120 kilos.

Tips per augmentar fitness

Constatescha l'app in grond strapatsch per il corp lura propona ella in tip. Quai po per exempel esser in exercizi da stabilisar il corp sura u in exercizi per las quaissas. Uschia che sportist pon trenar las parts dil corp ch'els dovran sin skis. Sper quels tips dat ella per exempel er tips en connex cun il material – p.ex di ella da ir cun in ski ch'ha in auter radius per uschia avair pli pauc strapatschs per il corp.

Las datas restan anonim

Cun l'applicaziun gratuita rimna la Suva in'entira massa datas. Tenor Samuli Aegerter restian quellas anonim. Pia la Suva na rimna betg adressas da mail ubain nums dals utilisaders. Cun agid da tut las datas ch'ella rimna durant la stagiun vulan Aegerter e ses collegas lura survegnir in maletg general co Svizras e Svizzers van cun skis ed uschia far prevenziun en questas spartas. La finamira è uschia da minimar il risico d'accident sin las pistas.

audio
App da la Suva duai prevegnir accidents sin pista
ord Co e cum dals 29.01.2020. Maletg: MAD
laschar ir. Durada: 2 minutas 51 Secundas.

RTR Co e cum 11:15

Artitgels legids il pli savens