Siglir tar il cuntegn

Header

In trafegl cun quatter fegls.
Legenda: Suenter ils success be curaschi per las elecziuns federalas – ils Verds ed ils Verdliberals svizzers han gì lur radunanzas da delegadas e delegads.. Keystone
cuntegn

Svizra Spranza per las elecziuns – radunanzas da Verds e Verdliberals

Suenter ils success tar las elecziuns chantunalas è la motivaziun tar Verds e Verdliberals gronda: A lur radunanzas da delegadas e delegads han els prendì en mira las elecziuns federalas. Quai rapporta l'agentura da novitads svizra SDA.

Gist duas partidas svizras che portan cun l'attribut «verd» l'engaschi per l'ambient ed il clima en lur nums, han gì la sonda lur radunanzas da delegadas e delegads. Tuttas duas èn sa mussadas rinforzadas da buns resultats ad elecziuns chantunalas per ir en las elecziuns federalas da l'atun.

Ils Verds sajan «sin la via dal victur»

Da quai è la presidenta dals Verds, Regula Rytz, sa mussada persvadida a Siders VS. La partida saja sin questa via cun quai ch'ella saja credibla, independenta e cun quai ch'ella fetschia ina politica guliva ha motivà Rytz sia persvasiun.

Rytz en la sala.
Legenda: Regula Rytz – persvadida da la forza dals Verds per las elecziuns federalas ils 20 d'october 2019. Keystone

L'engaschi per ina protecziun dal clima e da l'ambient consequenta chattia adina dapli sustegn tar la populaziun. Perquai haja la partida er gudagnà cun 41 sezs ils pli blers sezs insumma en elecziuns chantunalas. Rinforzads da quests buns resultats ad elecziuns chantunalas e localas han els lantschà lur campagna per las elecziuns federalas dals 20 d'october 2019.

En pli han ils Verds decis lur parolas per las votaziuns dals 19 da matg:

  • NA a la refurma fiscala liada a il finanziaziun da l'AVS
  • GEA a la lescha d'armas pli severa

Ils Verdliberals – per clima e contracts bilaterals

A Wangen an der Aare BE èn sa radunads ils delegads e las delegadas dals Verdliberals. Er els sa chattian rinforzads dals success tar las votantas ed ils votants, rapporta la SDA.

Grossen discurra al pult.
Legenda: Jürg Grossen – ils success en las ultimas elecziuns rinforzian la partida en sias posiziuns cleras. Keystone

Tgi che veglia protecziun dal clima ed il svilup dals contracts bilaterals na vegnia betg dad evitar ils Verdliberals ha ditg lur president Jürg Grossen.

Er ils Verdliberals han decidì lur parolas per las votaziuns dals 19 da matg:

  • NA a la refurma fiscala liada a il finanziaziun da l'AVS
  • GEA a la lescha d'armas pli severa

RR novitads 17:00