Entant che la gruppa Tobler ha fatg il davos onn da fatschenta ina svieuta da 330 milliuns francs è la svieuta dal concern Walter Meier stà il 2016 tar 240 milliuns.
La fusiun dals dus concerns duai ir en vigur 1:1. Il dumber d'aczias da la Walter Meier SA (oz 7'294'588) na duai dentant betg vegnir dublegià mabain sulet vegnir augmentà per 4'705'412 tocs. Per indemnisar la differenza e per egualisar posiziuns da bilantscha differentas paja Walter Meier SA 117,8 milliuns francs a Wolseley, il possessur englais da la firma Tobler. Suenter la transacziun posseda Wolseley 39,2% da las aczias da Walter Meier.
Plazzas van a perder
Entras la fusiun da Walter Meier e Tobler ad ina da las grondas interpresas da la branscha da la tecnica da chasa svizra, van a perder plazzas da lavur. A curta vista vegnian stritgadas 100 fin 120 da las total 1'400 plazzas da lavur da l'interpresa fusiunada communitgescha la firma Tobler. Els na veglian dentant betg relaschar persunas mabain nizzegiar la fluctuaziun normala.
Il cumenzament dal 2018 vulan las duas interpresas sa preschentar da nov cun in sulet num sin il martgà.
RR novitads 08:00