Ils 17 da matg avessan las Svizras ed ils Svizzers decidì davart trais fatschentas. La lescha da chatscha e la protecziun dal luf, ils custs per la tgira d’uffants tras terzas persunas e davart l’iniziativa da limitaziun da la pps. Mo èsi insumma raschunaivel da laschar decider la populaziun amez la crisa dal coronavirus davart talas fatschentas impurtantas?
Questa dumonda ha era fatschentà ils politichers grischuns avant che la decisiun definitiva da spustar las votaziuns è vegnida.
Infurmar cun auters meds
El haja confidenza el Cussegl federal e sche lez vegni a la conclusiun ch’i saja meglier da spustar la votaziun haja el chapientscha per quai pass, di il cusseglier naziunal cristiandemocratic, Martin Candinas.
Persunalmain saja el dentant dal maini ch’i fissi meglier da far la votaziun ils 17 da matg. Quai malgrà che podis e discussiuns publicas davart las fatschentas na pon betg vegnir manadas atras sco usità.
Jau sun qua dal maini ch'ins po far qua differentas chaussas cun era distribuir quellas via internet, radio e televisiun. Qua avain nus pussaivladads.
Betg pussaivel da furmar opiniun
Auter vesa quai sia collega, la cussegliera naziunala liberaldemocratica, Anna Giacometti. Las votaziuns sajan impurtantas ed ins stoppia far la segira che la populaziun sappia propi da tge ch'els hajan da decider.
I vegn prest mo pli tschantschà davart il coronavirus. Ed era en la Tagesschau ed en la gasettas è quai il tema numer in, quai è era chapaivel. Il privel è che nus na pudain betg s'infurmar a moda correcta davart ils projects davart ils quals nus stuessan votar.
Nagina basa legala directa
Spustar ina votaziun? Els na possian betg sa regurdar che quai saja gia ina giada vegnì fatg, ha ditg Beat Furrer da la Chanzlia federala a Berna. Ma prevesa la lescha insumma da far quai?
Quai n’è betg previs. Mo jau na vi betg specular sut tge cundiziuns ch’ins pudess spustar ina votaziun. I na dat qua nagina basa legala directa.
Cler è dentant: Sch'ils interess da la Svizra èn periclitads po il Cussegl federal duvrar dretg d'urgenza. E quai ha il Cussegl federal lura era fatg sco quai ch'igl è stà d'udir en circuls da l'administraziun federala gia ordavant.