Legenda:
Cun l'allianza vulan Ringier, la SRG SSR e la Swisscom rinforzar il martgà da reclama svizzer en la concurrenza globala.
Keystone
cuntegn
Svizra - SRG po far part da l'allianza da reclama da Ringier e Swisscom
L’allianza da reclama da la SRG SSR cun la Swisscom e la chasa editura Ringier po vegnir realisada. Suenter la cumissiun da concurrenza ha uss era il Departament federal per ambient, traffic, energia e communicaziun DATEC lubì la collavuraziun.
Tenor il Departament federal per communicaziun munta questa allianza probablamain nagina restricziun da la pussaivladad da sa sviluppar per las ulteriuras medias svizras.
SRG na dastga betg far reclama per gruppas specificas
Ina restricziun datti per la SRG SSR: Ella na dastga betg far reclama per gruppas specificas. Per quest pass fissi necessari d’adattar la concessiun.
L’Associaziun svizra dals editurs è cunter ils plans per l’allianza. La SRG SSR da sia vart argumentescha, che reclama per gruppas specificas saja indispensabla en il temp dal diever medial digital.
