Il producent da trens «Stadler Rail» ha suttascrit il contract per la pli gronda fatschenta en l'istorgia da la viafier en Svizra. Il contract general tranter «Stadler Rail» e las Viafiers federalas, sco er las interpresas affiliadas «Thurbo» en la Svizra Orientala e «RegionAlps» en il Valais cumpiglia passa 500 trens.
L'emprim furnescha Stadler bunamain 300 trens per radund duas milliardas francs. Stadler aveva gia survegnì l'october passà la lavur. Lura a il producent da trens franzos «Alstom» però fatg recurs. L'emna passada ha il Tribunal administrativ federal refusà quel.
