Siglir tar il cuntegn
Inhalt

Svizra Stagiun da zeccas ha cumenzà baud

En Svizra n'èn anc mai tantas persunas idas tar il medi pervi da morsas da zeccas sco quest onn. Fin l'avrigl ha l'Uffizi federal per la sanadad registrà 4’000 cas, quai ch'è dubel uschè blers sco la media dals ultims onns.

Ina zecca.
Legenda: La fom tumpriva han las zeccas sentì quest onn pervi da las temperaturas miaivlas. Keystone

Quest svilup na saja betg surprendent. Pervi da las temperaturas miaivlas dal schaner e favrer ha la stagiun da zeccas numnadamain cumenzà ordvart baud quest onn. Las zeccas daventan activas a partir da radund 7 grads celsius.

Las pli bleras zeccas durant matg e zercladur

Las 4’000 visitas tar il medi saja il pli aut dumber dapi il cumenzament da registraziun il 2008, uschia l’uffizi federal. Conjunctur’auta da zeccas datti cunzunt durant ils mais da matg e zercladur. Mintg’onn registreschan ils assicuraders en Svizra bun 9’700 morsas da zeccas.

Ina morsa dal tschitschasang po tranter auter chaschunar in’inflammaziun dal tscharvè FSME u la borreliosa. Cunter l'FSME datti ina vaccinaziun, cunter la borreliosa betg.

RR novitads 12:00