En vista a la stagiun d'atun e d'enviern, saja impurtant ch'i na dettia betg ulteriuras restricziuns pervi da Covid-19. Er per la stagiun d'enviern stoppian las mesiras da protecziun esser pragmaticas e realisablas e – tant sco pussaivel – valair en l'entir pajais tuttina.
Ils davos mais haja la branscha turistica surpiglià responsabladad. Ils concepts da segirezza elavurads hajan demussà ch'els sajan adattads e funcziunian. In ulteriur punct impurtant saja la libertad da viagiar. Glistas da pajais da ristg e restricziuns che sa midian adina puspè – sco la quarantina suenter entrar en il pajais – hajan in'influenza negativa sin il turissem svizzer.
Sommaruga ha taxà l'inscunter sco fitg impurtant. Ella ha dentant er ditg, che bler dependia dal svilup en l'exteriur e sin quai n'haja la Svizra nagin'influenza.
