Il privel da la grippa d’utschels vegnia saja da valitar sco grond, scriva l’Uffizi federal per la segirezza alimentara e fatgs da veterinari. Utschels migrants possian purtar il virus er en Svizra.
Megliurar mesiras d'igiena
Possessurs da giaglinom duain examinar las mesiras d'igiena tar lur manaschis e sch'i fa da basegn meglierar quellas. La populaziun duai annunziar utschels da l’aua crappads ad in guardiaselvaschina.
En l’Europa da l’ost hai tranter auter dà la grippa d’utschels en Pologna, tar manaschi da galdins.
Ultim cas confermà il 2017
Dapi mez december 2019 èsi vegnì intercurrì en Svizra sis utschels da l'aua crappads. Quai als lais da Genevera, Bienna e Wohlen. En tut ils cas è il resultat stà negativ; ils utschels n'èn pia betg crappads pervia da la grippa d'utschels.
L'ultima giada aveva la Confederaziun abolì mesiras da prevenziun il 18 da mars 2017 - suenter quater mais. Ordavant eran plirs utschels selvadis crappads, tar giaglinom da chasa na vevi però dà nagins cas.
Tut en tut eran vegnids confermads 121 cas tar 376 animals ch'eran vegnids analisads. L'ultim cas confermà da la grippa d'utschels è stà la fin december 2017 al lai da Bienna.
RTR novitads 11:00