Svizras e Svizzers han prestà il 2020 lavur betg pajada en la valita da 434 milliardas francs. Quai mussan las novas cifras da l'Uffizi federal da statistica. En tut èn quai 9,8 milliardas uras lavur betg pajada. En cumparegliaziun: lavur pajada hai dà 7,6 milliardas uras en Svizra, pia 2,2 milliardas damain.
La gronda part è lavur da chasa
En media da la populaziun munta quai a 1'350 uras che mintga persuna lavura gratuit. Las cifras da la lavur betg pajada sa basa sin atgna decleraziun. Latiers tutgan tranter auter lavurs da chasa e da curtin, la tgira d'uffants e da parents sco er lavur voluntara. Bunamain trais quarts èn dentant las lavurs da chasa. Quintà cun la paja media da professiuns cumparegliablas munta quai a 319 milliardas francs.
Entant che las dunnas prestan 60% da la lavur betg pajada èsi tar la lavur pajada gist il cuntrari. Là èn ils umens responsabels per radund 60% da l'activitad.