En il segund quartal da quest onn han bunamain 391’000 cunfinarias e cunfinaris lavurà en Svizra. Il dumber è creschì per 5,7%, cumpareglià cun il segund quartal da l’onn passà. Quai mussan las cifras da l’Uffizi federal da statistica.
Passa la mesadad da las cunfinarias e cunfinaris stattan en Frantscha. Cun quai èsi er cler che la pli gronda part dals cunfinaris e cunfinarias lavuran en la Svizra franzosa. Stgars in quart vegn da l’Italia e in 6avel da la Germania.
Situaziun en Grischun
En il Grischun lavuran cunfinarias e cunfinaris surtut en l'Engiadina, Val Müstair, Val Poschiavo e Bregaglia. En la vischnanca Bregaglia èn tenor l'Uffizi federal da statistica var 40% da las persunas occupadas confinarias.
