L’emprim onn da corona èn ils custs da sanadad creschids per 1% (0,8 milliardas), sin 83,3 milliardas francs. Quai resulta da las cifras provisoricas che l’Uffizi federal da statistica ha publitgà oz. Cunquai èn ils custs creschids il 2020 main fitg ch'en il trend dals tschintg onns avant.
Ils custs per ospitals (+0,5 milliardas) ed indrizs medicinals socials (+0,3 milliardas) èn creschids, ils custs per praticas da medis e centers ambulants èn dentant sa reducids per 0,8 milliardas. Quai sa laschia per part declerar cun las mesiras cunter il coronavirus, l'entschatta da la pandemia. Ils custs per prestaziuns da sanadad dal stadi èn creschidas fitg, cun in plus da 1,2 milliardas.
Surproporziunalmain fitg èn ils custs per la tgira da lunga durada, per material e per l’administraziun creschids. Il ferm augment tar la prevenziun, +9,9%, sa declera entras ils custs supplementars en connex cun la pandemia.
804 francs per persuna, per mais
Ils custs da sanadad han muntà il 2020 ad 804 francs per persuna e mais. Da quai ha la cassa da malsauns obligatorica surpiglià 305 francs, il stadi 175 francs. Per servetschs sco chasas da tgira, dentists e franschisas ha mintgin e mintgina anc pajà sez 174 francs.
La relaziun dals custs da sanadad ed il product interiur brut (BIP), cun ils pretschs actuals saja s'augmentada cumpareglià cun il 2019 da 11,3% sin 11,8%.