Siglir tar il cuntegn

Header

cuntegn

Statistica d'abitar Uschè bleras chasas d'ina famiglia sco anc mai

En l'entira Svizra hajan ins registrà il 2019 per l'emprima giada dapli che in milliun chasas d'ina famiglia. Tenor l'Uffizi federel da statistica èn quai stadas exact 1'000'700 chasas. En bunamain la mesadad da quellas abitavan ina u duas persunas. En il Grischun han ins registrà l'onn passà en tut bunamain 35'000 chasas d'ina famiglia. Er il dumber d'abitaziuns è creschì en l'entira Svizra cumpareglià cun il 2018. Quai da 3,78 milliuns sin 3,83 milliuns.

Svizzers pon plitost sa prestar in'atgna chasa

En trais quarts da las chasas d'ina famiglia abitan persunas da naziunalitad svizra. En in quart abitan persunas da naziunalitad estra u cumbinada svizra ed estra. Percunter è la mesadad da las persunas che abitan en abitaziuns da pigliar a fit da naziunalitad estra.

Ils Genevrins vivan sin il pli pitschen spazi

En media era in'abitaziun en Svizra l'onn passa 102,3 meters quadrat gronda ed aveva 3,7 chombras. Mintga persuna aveva 46 meters quadrat a disposiaziun.

Ils Genevrins han vivì il 2019 en media sin 41,8 meters quadrat. En l'entira regiun dal Lac Léman eran las abitaziuns en media 95 meters quadrat grondas. Per cumparegliar: En il nordvest da la Svizra eran las abitaziuns en media 106 meters quadrat grondas, en la Svizra centrala 108,8 meters quadrat ed en la Svizra orientala 109,6 meters quadrat.

RTR novitads 11:30

Artitgels legids il pli savens

Scrollar a sanestra Scrollar a dretga