En Svizra stenschan mintg'onn radund 120 persunas. Savens sajan quai persunas pli veglias e l'accident capitia durant mangiar. Stenscher è uschia il segund savens motiv da mort tar ils accidents ordaifer il manaschi.
Sco quai ch'il Post da consultaziun svizzer per la prevenziun d'accidents BFU communitgescha stenschan 6 da 10 persunas durant mangiar. Radund 70% da las persunas stenschidas eran sur 65 onns veglias. Ad onn stenschan en media dentant er 3 uffants sut 4 onns. Il BFU fa en quest connex er attent che uffants pitschens pon stenscher vi da tocs pitschens sco magnets u batterias radundas e chaussas sumegliantas.
Tar sintoms alarmar forzas da salvament!
Be mintga 10avel accident da stenscher vegn però er percurschì sco in tal, e quai malgrà che dus terzs da las unfrendas n'èn betg sulettas, cura che l'accident capita. Sch'ina persuna mussia sintoms da panica, fadia da trair il flad, u daventia blaua, lura saja immediat dad alarmar las forzas da salvament e da suandar ils avis da quellas.
Cupitgadas restan la raschun pli frequenta
Tut en tut vegnan sa blesseschan en Svizra mintg'onn passa ina milliun persunas tar accidents en il tegnairchasa u durant il temp liber. 37'000 da quellas persunas vegnan blessadas fermamain e 2'400 da quels accidents fineschan che la persuna mora. Il pli savens moran persunas pervi dad accidents ordaifer il manaschi, perquai ch'els cupitgan – en in onn capita quai en media en Svizra radund 1'680 giadas.
Radund 85% da tut ils accidents ch'i dat en Svizra capitan en il tegnairchasa u durant il temp liber. 21'000 persunas blessadas pon vegnir attribuidas ad accidents da traffic sin via. 419'000 accidents datti mintg'onn en il sport, ils pli blers da quels tar sport da balla (136'000), avant sport d'enviern (90'000) e sport da muntogna ( 29'000).