L'onn passà han ils posts per gidar unfrendas da delicts fatg pli che 41'000 cussegliaziuns – bunamain 7% dapli ch'anc durant l'onn avant. Quai mussan las cifras da l'Uffizi federal da statistica.
Pli che dus terzs da las persunas ch'han tschertgà agid tar in dals posts da cussegliaziun eran dunnas. Bun in sisavel da las unfrendas eran il temp da la cussegliaziun anc minorennas e pli che la mesadad da las persunas eran burgais svizzers.
Tar bun la mesadad dals cas ch'èn vegnids cussegliads, gievi per violenza en la famiglia. En prest la mesadad dals cas avevi dà ordavant ina blessura corporala u violenza. Dumondas per sustegns finanzials hai dà var 1'200 e la mesadad da quellas èn vegnidas acceptadas.
Agid a las unfrendas po mintga persuna dumandar, ch'è vegnì violà en sia integritad corporala, psichica u sexuala tras in delict.
RR novitads 12:00