Siglir tar il cuntegn

Header

cuntegn

Statistica da l'onn 2021 Adina pli paucs purs e puras

Il dumber da manaschis purils en Svizra, è sa reducì er l'onn 2021, scriva l'Uffizi federal da statistica. Pertutgads èn sur tut manaschis pli pitschens e convenziunals. La surfatscha per l'agricultura en Svizra è l'onn 2021 stada 1'042'100 hectaras. La gronda part cun 58% saja stà prà natiral e pastgira e 38% saja stà la cultivaziun dad ers.

L'onn 2021 ha la Svizra gì 48'864 manaschis d'agricultura. Cumpareglià cun l'onn avant sajan quai radund 500 manaschis pli paucs (1%). Pertutgads èn sur tut manaschis pli pitschens e convenziunals cun sut 20 hectaras. Là hai dà ina reducziun da -2,8%. Tar ils gronds manaschis cun sur 30 hectaras hai dà ina augmentaziun da +1,3%. La media saja tar 21,3 hectaras. Adina pli blers purs midian tar l'agricultura biologica. L'onn 2021 ha dà 7'670 manaschis biologics.

Plantà dapli graun

L'onn passà han purs svizzers plantà graun sin 3% dapli surfatscha che l'onn avant. La surfatscha per tartuffels e ravas da zutger è però sa sminuida. Quai mussa l'enquista da structura da l'agricultura annuala da l'Uffizi federal per statistica. Creschida il pli ferm è la surfatscha per tredi, avaina e furment. La surfatscha per tirc è suenter dus onns augment puspè sa reducida.

Medem bleras vatgas, dapli portgs

Il davos onn è il dumber da vatgas da latg restà stabil, quai suenter ina reducziun durant ils davos sis onns. Era tar ils portgs hai da ina midada, il dumber da lez è creschì per l'emprima giada dapi 2015, per 1,3%. Be 2,7% dals portgs èn «bio».

En il chantun Grischun è cunzunt il dumber da giaglinas creschids ils davos onns. Quai per passail dubel en ils davos 20 onns.

RTR novitads 10:00

Artitgels legids il pli savens