En Svizra èn 6'310 persunas stadas en praschun la fin da schaner 2022. Quai èn sis persunas pli paucas ch’anc avant in onn. Quai ha communitgà l’Uffizi federal da statistica. 86% da las plazzas da detenziun en tut las 91 praschuns sajan stadas occupadas la fin da schaner. Da tut las persunas arrestadas sajan 380 stadas dunnas. Quai correspunda a 6% da tuts praschuniers – uschè bleras sco dapi 13 onns betg pli.
L'enquista davart il dumber da praschuniers vegn fatga dapi il 1988. Ella infurmescha davart il dumber da praschuniers tenor il tip da l’arrest, tenor la schlattaina e tenor la naziunalitad, sco er davart il dumber da plazzas d’arrest il di da referenza, ils 31 da schaner. Medemamain eruids vegnan il dumber d’entradas, da dis d’arrest, da mortoris e da fugias da l’onn precedent.
