L’onn passà han Svizzers e Svizras lavurà dapli ch’il 2021. Quai mussan las cifras actualas da l’Uffizi federal da statistica. En tut hajan ins registrà passa 7,9 milliardas uras da lavur. Quai è 1,3% dapli ch'il 2021, ed uschia puspè sin il livel d'avant la pandemia. La raschun saja ch’i dettia dapli plazzas da lavur (+1,5%). Sch’ins prenda tut la glieud che lavura, han las persunas en Svizra lavurà en media 35 uras e 45 minutas per emna. La Svizra tutga cun quai tar ils pajais europeics cun il pli pitschen temp da lavur effectiv ad emna. Il pli ditg lavuran tenor statistica ils Grecs e las Grecas, cun bunamain 40 uras l'emna. Il pli pauc la populaziun dal Pajais Bass, cun 30 uras e 50 minutas.
Da il 2017 fin al 2022 è il temp da lavur total per emna sa reducì per 59 minutas, sin 39 uras e 59 minutas, per ina plazza cumplaina. Ils motivs per quella reducziun èn ch'il temp emnil da lavurar fixà en ils contracts è sa reducì per 10 minutas (sin 41 uras,43 minutas), igl ha dà 15 minutas pli paucas sururas per emna (40 minutas) e las absenzas èn s'augmentadas per 33 minutas (2 uras, 25 minutas).
En il medem temp hai dà in augment da temp da vacanzas da 5,1 emnas sin 5,2 emnas (+0,2 dis). Persunas da 20 fin a 49 onns han cun 5,0 emnas pli paucas vacanzas che quellas tranter 15 e 19 onns (5,4 emnas) e quellas da 50 onns fin 64 (5,6 emnas).
