Siglir tar il cuntegn

Header

La tabla da Bellinzona a la staziun sin in perrun.
Legenda: La naiv impedescha il traffic da tren e dad autos en il Tessin. Keystone
cuntegn

Svizra Staziun da Bellinzona serrada pervi da naiv

Il traffic da tren enturn Bellinzona è vegnì interrut il glindesdi suentermezdi pervi da naiv.

Pervi da la naiv intensiva è il manaschi da viafier vegnì sistì en la vischinanza da la staziun da Bellinzona. Ina lingia electrica cupitgada ha fatg che tut las colliaziuns èn crudadas ora. Bus da substituziun n'han betg pudì vegnir mess en, perquai che tut ils bus a disposiziun èn gia vegnids duvrads en auters lieus, ch'èn pertutgads dad interrupziuns da traffic pervi da la naiv.

Las Viafiers federalas recumondan urgentamain da betg ir en il sid. Er trens internaziunals n'han ditg betg pudì passar. Entant curseschan intgins trens puspè. L'emprim avev'ins quintà cun in disturbi da 3 uras. Suenter ha la SBB ditg ch'i cuzzia pli ditg, senza dentant pudair dir, quant ditg.

A13 serrada per camiuns davent da Tusaun

Suenter ch'i è crudà en divers lieus tranter 30 e 50 centimeters naiv, hai er dà incaps tar il traffic dad autos. Per exempel ha la A13 tranter Tusaun e Bellinzona stuì vegnir serrada per camiuns. Ed er sin la A2 en il sid dal Gottard hai dà problems pervia da las cundiziuns sin via.

RR novitads 16:00

Artitgels legids il pli savens

Scrollar a sanestra Scrollar a dretga