La gievgia saira ha il stemprà Bianca buffà sur la Svizra. Las pli autas spertadads da vent èn vegnidas mesiradas sin il Chasseral cun 172 e sin il Säntis cun 168 kilometers per ura. Quai communitgescha SRF Meteo.
Però er en regiuns pli bassas da las Pre-Alps hai buffà ferm. A Nossadunnaun per exempel cun 131 kilometers per ura. A Gersau LU hai dà vents da 128 ed a Paffeien FR vents da 122 kilometers per ura.
Plantas e tavlas derschidas
Surtut la polizia ed ils pumpiers en ils chantuns Soloturn, Argovia, Turgovia e Son Gagl èn stads dumandadas la gievgia pervi dal stremprà. En divers lieus èn plantas derschidas sin autos, tavlas da plazzals crudadas enturn e quadrels da tetg suflads davent. Sin l'autostrada A1 da manaivel dad Oensingen en il chantun Solothurn ha Bianca derschì in camiun-tractor. Nagin n'è vegnì blessà.
Annullà cursa da cumbinaziun pervi dal stemprà
La cumbinaziun alpina dals umens dad oz a Hinterstoder en l'Austria è vegnida annulada. Il stemprà Bianca ha purtà plievgia e blera naiv. Perquai ch'era las prognosas per il rest dal di n'èn betg bunas, han ils organisaturs ditg giu l'occurenza. Schebain e cura che la cursa vegn prendida suenter n'è anc betg cler.
RTR novitads 09:00