Durant il stemprà è ina persuna morta ier saira Gurzelen en il chantun Berna. Quai ha communitgà la Polizia chantunala. Ina planta saja derschida sin l’auto d’in um da 72 onns. Independent da quai è ina ulteriura persuna vegnida blessada.
En ils chantuns Turitg, differents chantuns en la Svizra centrala e Berna han pumpiers e truppas d'agid gì numerusas acziuns questa notg per rumir plantas e roma da las vias. En ils chantuns Turgovia, Schaffusa ed Appenzell Dadora è l'electricitad stada interrutta per curt temp.
Vents da 120 kilometers l'ura al lai da Turitg
Ma era en la Bassa ha Frederico buffà cun per part passa 120 kilometers l'ura. A Wädenswil sper il Lai da Turitg per exempel hai dà vents d'ina sveltezza da bunamain 120 kilometers l'ura. Per part èn vias vegnidas serradas. A Steckborn (TG) ha il vent gì ina sveltezza da 99 kilometers l'ura, a Le Bouveret (VS) 98 kilometers per ura ed a Einsiedeln (SZ) 97 kilometers l'ura.
En il chantun Schaffusa è l'electricitad crudada ora per curt temp en in per vitgs. Il stemprà tschessa plaunsieu. I po persuenter naiver fin ad 800 meters.