Siglir tar il cuntegn

Stgarsezza d'abitaziuns Perquai che vischins portan plant, datti memia paucas abitaziuns

En Svizra vegnan construidas memia paucas abitaziuns per dar suttetg a la populaziun creschenta. Uss mussa in studi per incumbensa da la Confederaziun: Il motiv principal da projects impedids èn las protestas ed ils recurs.

Protestas da vischins u recurs da federaziuns d'ambient èn in frain per bajegiar abitaziuns. A questa conclusiun vegn in studi per incumbensa da l'Uffizis federal per svilup dal territori ARE e da l'Uffizi federal per fatgs d'abitaziuns BWO. Sche novas abitaziuns na vegnan betg construidas u retardadas en Svizra, sajan responsabels en emprima lingia las protestas ed ils recurs cunter ils projects, scrivan ils uffizis federals en ina communicaziun communabla.

La maioritad dals recurs vegn refusada

Uschia han circa 63 pertschient da las producentas e dals producents d'abitaziuns interrogads ditg ch'els sajan bunamain adina confruntads cun protestas ils ultims onns en connex cun la construcziun d'abitaziuns. Ma er autoritads cun process da planisaziun surchargiads contribueschan a la miseria, mussa il studi.

Luftaufnahme einer Baustelle in der Stadt mit Kränen und umliegenden Gebäuden.
Legenda: Tgi che vul abitar sto construir. Sin l'anteriur areal da Koch a Turitg-Altstetten vegnan construidas var 360 abitaziuns da societad cooperativa per 900 persunas. Pervia da protestas sa reducescha dentant la motivaziun per tals projects da construcziun. Keystone

Las consequenzas: Las abitaziuns vegnan pli tard sin il martgà. Tenor il studi contribueschan ils protests ed ils recurs er ad ina purschida d'abitaziuns pli stgarsa e chaschunan pretschs da locaziun e da cumpra pli auts.

Davant dretgira sa mussa alura: Tar las instanzas chantunalas superiuras vegn refusada ina clera maioritad da las protestas.

Protestas querulantas

In proprietari d'ina chasa po sa defender senza ina ristga finanziala cunter in project da construcziun en ses vischinadi. Tenor il Tribunal federal na dastgan ins numnadamain adossar nagins custs als protestaders cunter projects da construcziun. Qua è la tentaziun gronda da simplamain empruvar ina giada – sche mo per avair anc in pèr mais u onns pli ditg ruaus da la canera dal plazzal.

Tschertins van perfin uschè lunsch da far profit da la chaussa e da proponer al patrun da construcziun: Sche ti ma das daners, retir jau la protesta. Quai è atgnamain scumandà.

Ussa mussa il studi: la strategia ristgada va si. 59 pertschient da las producentas e dals producents d'abitaziuns interrogads han gia ina giada indemnisà finanzialmain pretensiuns informalas. 23 pertschient pajan schizunt savens u quasi adina. E: quasi nagin na denunziescha pervi da sforz, perquai ch'i na sa lascha betg gudagnar temp e perquai che las schanzas da success èn memia pitschnas.

Far pli char ed optimar il process

Tenor il studi datti in grond consens che las ristgas sajan repartidas en moda memia unilaterala. Las auturas ed ils auturs proponan che pli pauca glieud possia protestar en l'avegnir e ch'ellas ed els duain era pajar dapli daners per quest intent. Uschia sa laschian reducir las protestas abusivas. Era las proceduras duessan vegnir optimadas ed acceleradas.

Studi per incumbensa da la Confederaziun

Avrir la box Serrar la box

En il rom dal studi èn vegnidas interrogadas circa 440 persunas dals secturs patrun da construcziun, svilup, architectura sco era giuristas e giurists d'advocaturas, da l'administraziun, da las scolas autas e da las dretgiras.

Quai saja pussaivel senza violar ils dretgs fundamentals da las persunas pertutgadas u senza perder la democrazia. Ils auturs dals studis crititgeschan il Tribunal federal ch'è «spezialmain favuraivel als protests» e pretendan che sia giurisdicziun vegnia curregida cun midadas da la lescha.

RTR actualitad 12:00

Artitgels legids il pli savens