Siglir tar il cuntegn

Header

cuntegn

Svizra Stimaziun dals donns da la schelira

La schelira da la fin d'avrigl fa quitads als producents da puma svizzers. In mais suenter las fraidas notgs pon vegnir stimads ils donns vid las cultiras.

Suenter las scheliras da la fin d’avrigl, ha l’Uniun da puma svizra ussa publitgà emprimas stimaziuns dals donns. Tar las tschareschas quinta l'uniun cun ina racolta da radund 800 tonnas quai che correspunda a radund 75% pli pauc ch'ina racolta ordinaria. La perdita munta a passa 20 milliuns francs.

Grondas differenzas regiunalas

Per maila datti differenzas da perditas da racolta fitg grondas sur las regiuns. En il valais èn donnegiads var 10 fin 20% da la maila. Percunter muntan en la Svizra Centrala ils donns vi da la maila a var 80%. Sur l’entira Svizra quinta l’uniun tar maila e paira cun ina perdita da circa 35% quai che munta a radund 38 milliuns francs.

Tar las apricosas quinta l'uniun cun ina perdita da circa 50% e 14 milliuns francs. Fertant ch’i na dat bunamain nagina perdita da racolta tar las cultiras d'apricosas en las planiras dal Valais, quintan ils producents sin las spundas cun perditas dad 80 fin 100%.

Betg uschè gronds donns hai dà tar ils farbuns. Las cultiras en tunnels da folias èn praticamain restadas senza donns.

RR novitads 15:00

Artitgels legids il pli savens