Siglir tar il cuntegn

Header

cuntegn

Stoos-Fronalpstock Sutgera collidada cun suga da vehichel da pista

Gievgia saira è ina sutga da la sutgera Stoos-Fronalpstock (SZ) crudada giu. Quatter persunas èn vegnidas blessadas. Sis persunas che sajan suandadas en las sutgas suandantas, han las forzas da salvament pudì spendrar senza blessuras. Capità è l'accident la saira tard curt suenter las 22:00 uras tar la secziun sura da la sutgera, ha declerà la Polizia chantunala Sviz anc la notg.

Suga d'in vehichel da pista enta pe

La sutga ch'è crudada giu è collidada cun ina suga e perquai crudada radund 10 meters a bass. Cun la suga era sco para fermà in vehichel da pista per ch'el na glischnia betg davent, ha communitgà la polizia.

video
Florian Grossmann: «2 passagiers èn en privel da vita, 2 han blessuras considerablas»
Or da News-Clip dals 07.02.2020.
laschar ir

Co igl ha pudì vegnir tar questa situaziun vegn il mument sclerì, scriva la polizia. Tar la crudada èn ina dunna da 33 onns ed in um da 40 onns sa blessads talmain ch'igl èn en privel da vita. Dus umens en la vegliadetgna da 33 e 38 onns han blessuras considerablas. Cun quatter helicopters èn las persunas vegnidas transportadas la notg en clinicas spezialas.

video
Thomas Meyer: «Nus essan consternads fermamain»
Or da News-Clip dals 07.02.2020.
laschar ir

Il viadi cun la sutgera saja dentant stà annunzià sco usità. Pertge che la sutgera ha pudì collidar cun la suga saja ina dumonda centrala e vegnia uss sclerida. Al manischunz dal vehichel da pista na giaja betg bain, ha accentuà Bruno Lifart, delegà dal cussegl d'administraziun da las pendicularas dal Stoos. Dumondas da culpa na veglian ins betg tschentar il mument.

Il mument na sa tschenta betg la dumonda da culpa. Sch'ins ha ina sutgera cun quatter blessads, vulan ins sco pli emprim simplamain gidar uschè svelt sco pussaivel
Autur: Bruno LifartDelegà dal cussegl d'administraziun dal Stoos

Dasper las forzas da segirezza da Sviz, ils pumpiers dal Stoos e la polizia chantunala sajan er quatter helicopters stads en acziun. En il decurs dal di vulan las autoritads porscher dapli infurmaziuns tar il cas.

Betg l'emprima disgrazia

Textbox aufklappenTextbox zuklappen
  • En il passà hai gia dà ina disgrazia cun la sutgera dal Fronalpstock.
  • Il mars 2016 era ina sutgera vi da la sutgera da 4 plazzas Mettlen-Fronalpstock crudada giu. L'accident era capità tar la pitga numer 9.
  • Là n'eran naginas persunas vegnidas blessadas. La sutga ch'è crudada giu, sco era la suga eran vegnidas donnegiadas tar l'accident.

Raschuns vegnan scleridas

Per sclerir tge ch'è exact capità e co l'accident ha pudì capitar, ha la polizia involvì il Post per examinaziun da segirezza SUST.

Il mument n'è la secziun sura da la sutgera Stoos-Fronalpstock betg en funcziun, hai gì num vinavant. Dal temp che l'accident saja capità ier saira n'haja gì nagin vent, ha declerà in pledader da la polizia. Ins saja vid sclerir ils detagls.

RTR novitads 08:00

Artitgels legids il pli savens

Scrollar a sanestra Scrollar a dretga