En las apotecas dal chantun Grischun che porschan tests hai dà oz bleras ensainas da dumonda. Il Cussegl federal aveva annunzià ch'ils tests sajan a partir da quest glindesdi gratuits. Ma co quai funcziunescha propi ed a tgi ch'i saja d'annunziar e co il process da pajar funcziuneschia, gliez na saja betg vegnì communitgà – tant betg dal chantun ed era betg da la Confederaziun.
Jau crai ch'il chantun ha per il mument betg simpel. Sch'insatgè vegn da surengiu e l'entira populaziun spetga per part desperà da finalmain far insatge. Jau crai ch'i sto vegnir da sura directivas.
Chapientscha per la situaziun actuala è avant maun tar la presidenta da l'associaziun d'apotechers ed apotecras. Tuttina han las apotecas en il Grischun oz stuì restar tar il status quo. Vul dir: era oz han ins anc stuì pajar per tests svelts sch'ins n'ha nagins sintoms. Monika Fehr spera ussa ch'il chantun prendia si contact cun la Confederaziun e communitgescha tant pli spert tge che saja da far.
Irritaziuns cun tests da prender a chasa
Blers sajan gia stads en apoteca per survegnir ils tests da prender a chasa. La Confederaziun aveva annunzià che mintgin e mintgina survegnia 5 tests il mais da prender a chasa per savair testar individualmain. Che quels tests na sajan dentant anc betg accessibels davent dad immediat ha la Confederaziun gia communitgà. Las apotecas sajan vegnidas infurmadas che quai cuzzia segir anc enfin l'avrigl.