La strategia dal clima mussa co la Svizra vul cuntanscher fin il 2050 la finamira da reducir las emissiuns da gas da serra sin netto nulla. Quai saja pussaivel e pajabel, ha cussegliera federala Simonetta Sommaruga ditg la gievgia avant las medias. La Svizra vegn ad inoltrar la strategia il proxim temp tar il secretariat dal clima da l’ONU.
La strategia saja necessaria, las temperaturas vegnian a crescher pli spert en Svizra che vis sur l’entir mund. Quai ha punctuà a l’orientaziun Katrin Schneeberger, la directura da l’Uffizi federal da l’ambient.