Siglir tar il cuntegn

Header

cuntegn

Svizra Street Parade 2018 – dapli lavur per la sanitad

La 27avla ediziun da la Street Parade carmala puspè 1 milliun visitadras e visitaders. Uschè blers han ins mo anc dumbrà il 2001 ed il 2015. La sanitad ha dumbrà pli ch'in terz dapli cas nua ch'ella ha gidà, mussa ina bilantscha intermediara. Ed ella annunzia dus cas gravants.

Gia tar il «warm-up» a las 13:00 era il plaz dal Sechseläuten plain. Cun serrar vias temporarmain ha la polizia da la citad da Turitg chanalisà visitaders e participants, per evitar che vias u plazzas vegnian memia plainas. Las cundiziuns èn stadas idealas per la parada – cun bler sulegl e temperaturas betg memia chaudas.

Dapli da far per ils buns anghels

In quart dapli acziuns cumpareglià cun l’onn passà, annunzian las organisaziuns d’agid en in’emprima bilantscha intermediara. 724 tractaments hai dà en tut. Dapli glieud e temperaturas pli chaudas sajan tranter auter las raschuns. Tractà han ins cunzunt blessuras cun sa tagliar e sa sgriflar, bleras piztgadas d’insects e persunas ch’han consumà memia bler drogas u alcohol.

Plinavant hai dà quatter cas gravants. In um giuven è sa blessà vi dal chau e vi da la tatona cun siglir giud la punt dal Quai en l’aua. In ulteriur um è crudà grevamain ord ina grond’autezza. Omadus umens ha la sanitad transportà cun blessuras betg cleras en l’ospital.

La ruta da la Street Parade a Turitg ha manà sur 2,4 kilometers dal Utoquai enturn il batschigl dal Lai da Turitg fin tar il cuntschet Enge. Il til d'amur cun 28 Love Mobiles vala sco ina da las festas da tecno las pli grondas dal mund. Il motto da quest onn è stà «Cultura da toleranza», e manegia tenor ils organisaturs la convivenza da persunas da differenta derivanza, differenta religiun e differenta orientaziun sexuala.

RR novitads 12:00

Artitgels legids il pli savens