Siglir tar il cuntegn

Header

Navigaziun

Plantas en in guaud.
Legenda: Keystone
cuntegn

Stress da sitgira Perioda da sitgira actuala è supportabla per il guaud

Sin il pli tard dapi il 2018 èsi sa mussà: Las plantas pateschan da stress da sitgira. La perioda da sitgira actuala è per il mument però supportabla per il guaud, constatescha l’institut federal da perscrutaziun WSL.

Cumpareglià cun l’onn passà sajan las plantas en ils guauds per gronda part anc fitg verdas. Ils pigns e faus che sajan vegnids brins sajan la consequenza da la sitgira dal 2018. Bleras plantas avevan smess da crescher e n’avevan betg pli pudì reagì sin la plievgia.

Dimensiuns sco dapi 150 onns betg pli

Surtut pigns, faus ed aviezs cun sintoms da malsognas morian ussa. Quai en ina dimensiun uschè gronda sco dapi 150 onns betg pli. Talas periodas da setgira datti tenor l’institut per regla mintga in fin dus decennis. Dapi l’onn 2000 hai però gia dà quatter fin tschintg onns sitgs – ils pli ferms il 2003 ed il 2018.

Bau-scorsa è il problem

Pervia da la sitgira e chalira daventan las plantas flaivlentadas il mument però unfrenda dal bau scorsa. Ina cumbinaziun dad onns sitgs e chauds cun stemprads promova la derasaziun.

Cumbat encunter il bau-scorsa

Cuntrari a la Germania na dastgan plantas che vegnan attatgadas dal bau-scorsa en Svizra betg vegnir tractadas cun meds da sprizzar. Ils selviculturs intervegnan be punctualmain cun pinar plantas attatgadas. Surtut en guauds da protecziun vegni però plantà a moda activa plantas per emplenir las foras.

Ordvart alarmanta è la situaziun en il chantun Basilea. Là èsi per part vegnì serrà tschertas parts dal guaud per la populaziun. Quai pervia da plantas instabilas.

RR novitads 16:00