Siglir tar il cuntegn
cuntegn

Svizra Strusch bastards da chaun e luf

En las Alps svizras na datti strusch bastards da lufs e chauns, quai han constattà scienziads da l'universitad da Losanna. Da 115 lufs examinads valan sulet dus betg sco lufs stgets. L'integritad genetica dal luf na saja betg periclitada, scrivan ils perscrutaders.

in chaun-luf
Legenda: Quai n'è betg in bastard mabain in represchentant da la razza da chaun-luf. Keystone

En la revista «Scientific Reports» scrivan ils perscrutaders che stgars 2% dals lufs en las Alps svizras hajan segns genetics d'esser ina maschaida tranter luf e chaun. Ils perscrutaders han fatg las analisas da DNA sin fundament da las provas da spida, excrements u chavels ch'èn arrivadas dal 1998 fin il 2017 en il labor. Da 3'463 provas han ils scienziads pudì attribuir 1'645 a totalmain 115 animals.

Ils gens da quests 115 lufs han els cumpareglià cun ina gruppa da referenza da 70 chauns.

Ils dus bastards, ina femella ed in maschel, èn probabel ils descendents d'ina cruschada ch'i ha dà duas u trais generaziun avant. Ils dus animals han probabel gia puspè bandunà la Svizra. Da las trais rotschas da lufs enconuschentas en las Alps Svizras mussan naginas segns da cruschadas cun chauns, accentueschan ils scienziads.

RR novitads 16:00