Las scolaras ed ils scolars svizzers han cuntanschì en il Studi da Pisa 484 puncts en leger. Quai èn trais puncts pli pauc che la media da tut ils pajais da l'OECD. Quai resulta da las novas cifras tar il Studi da Pisa ch'èn vegnidas publitgadas il mardi.
En matematica percunter èn ils scolars svizzers anc adina top. Uschia han els cuntanschì en il studi 515 puncts. La media da tut ils pajais da l'OECD è tar 489 puncts. Anc meglier ch'ils scolars svizzers èn surtut quels dals pajais asiatics sco er quels da la Estonia, dals Pajais Bass e da la Pologna.
Tar las enconuschientschas da scienza natirala han ils Svizzers cuntanschì 495 puncts. La media da l'OECD è tar 489 puncts. Sin ils rangs avant la Svizra sa chattan ils pajais Germania, Svezia, Belgia e Tschechia.
Pli schlets resultads dapi il 2012
Tenor il studi èn ils resultats dals scolars svizzers en general vegnids menders dapi il 2012 – e quai en tut las disciplinas. La differenza tar ils resultats dal 2018 munta tranter 16 puncts en matematica e 20 puncts en la scienza natirala.
La OECD menziunescha en ses studi er che la cumpart dad uffants cun biografia da migraziun saja creschida marcantamain tranter il 2009 e 2018. Per resguardar quest fatg èn ils resultats en la disciplina leger vegnids auzads per tschintg puncts.
RTR novitads 10:00