Ils ristgs finanzials che stattan en connex cun la sperdita da la biodiversitad, pudessan periclitar la stabilitad dal sistem da finanzas. Quai resulta d'in studi che l'interpresa per cussegliaziuns d'interpresas PwC Svizra e l'organisaziun d'ambient WWF Svizra han preschentà il mardi a l'ur dal WEF a Tavau.
Ils ristgs pudessan durant il 2020 anc s'augmentar. Las duas organisaziuns pretendan perquai da las Bancas naziunalas sco er da las autoritads da surveglianza, ch'il tema vegnia resguardà pli ferm.
Tuts secturs d'economia dependents da biodiversitad
Fertant che la midada dal clima vegnia gia renconuschida dad adina dapli acturs sco ristg finanzial, manchia anc adina l'esser conscient che la sperdita da la biodiversitad saja in ristg per l'ambient.
Concret maina la midada dal clima ad ina svelta midada dals sistems ecologics. Quai puspè mainia ad ina augment dal stgaudament dal clima. I saja privlus che la branscha da finanzas na resguardia betg quests fatgs. Bunamain tut ils secturs da l'economia sajan numnadamain dependents da la biodiversitad. Ha ditg il CEO da PwC, Andreas Staubli, tenor la communicaziun a las medias.
RTR novitads 17:00