Mo gist 18% da las passa 1'200 persunas ch'èn sa participadas a la retschertga telefonica il schaner han guardà cun in sentiment positiv en il futur – quai pertutgant la situaziun mundiala. Tenor ils auturs dal studi è quai la cifra la pli bassa dapi ch'ins ha cumenzà cun la retschertga il 2015. La tenuta negativa saja gia s'accentuada suenter l'attatga da la Russia sin l'Ucraina e saja pervia dal conflict tranter l'Israel e la strivla da Gaza, sco i para, anc ina giada vegnida pli gronda, statti scrit en il studi.
Situaziun svizra vesa la populaziun pli positiv
Pli positiv vesa la populaziun la situaziun da la Svizra, radund 80% han in bun sentiment per il futur da la Svizra – ed ina gronda part fida a las instituziuns Svizras. Era qua laschian ils differents conflicts mundials dentant enavos fastizs, scrivan ils auturs. Avant l'attatga da la Russia sin l'Ucraina era la media dal dumber da las persunas optimisticas bun 6 puncts pli auta.
