Siglir tar il cuntegn

Header

cuntegn

Studi da WHO Giuvenils sa movan memia pauc

In'ura moviment a di basta per uffants e giuvenils, manegia l'Organisaziun mundiala da sanadad WHO. Tenor in nov studi dumognan quai sin l'entir mund dentant mo in tschintgavel dals giuvens dad 11 fin 17 onns.

Er ils giuvenils svizzers na survegnan betg bunas notas en il studi publitgà dal magazin spezialisà «The Lancet». 82,5% dals buobs e schizunt 89,1% da las mattas n'eran il 2016 corporalmain betg activas avunda. Cumpareglià cun il studi da l'onn 2001 èn las cifras svizras vegnidas mendras, oravant tut tar ils buobs. Er sin l'entir mund haja be dà ina pitschna meglieraziun.

Digital enstagl activ

Tenor ina coautura dal studi haja dà ina «revoluziun electronica» che haja sco i para midà ils musters da sa muventar da giuvenils ed animà els da seser dapli, d'esser pli pauc en moviment, da charrar dapli e d'ir pli pauc a pe. La finala gioghia la giuventetgna dapli a moda digitala che propi activ.

Ina ulteriura raschun per la mancanza da moviment saja l'aspect da segirtad. Quel vala almain per tschertas regiuns dal mund. Sch'i na saja memia pauc segir d'esser ordavert, sche lura giajan giuvenils er pli pauc savens a pe ni cun il velo a scola.

Uffants: 60min a di – Creschids 150min ad emna

Avrir la box Serrar la box

La WHO cusseglia ad uffants e giuvenils (5-17 onns) da sa muventar almain 60 minutas a di. Dapli moviment saja adina d'avantatg per la sanadad.

Persunas creschidas (18-64 onns) duain avair almain 150 minutas moviment ad emna – u far almain 75 minutas sport.

Buobas pli pauc activas

La medema differenza tranter buobs e buobas en Svizra constatescha la WHO er a nivel internaziunal: 77,6% dals buobs e 84,7% da las buobas sa movan memia pauc. Las pli grondas differenzas tranter buobs e buobas è da constatar en l'Irlanda ed en ils Stadis Unids. Tut en tut chattan ins la pli gronda cumpart da giuvenils inactivs en la Corea dal Sid (94,2%), la pli pitschna en il Bangladesch (66,1%).

Atgnamain ha la WHO la finamira da sbassar tochen il 2030 la cumpart da giuvenils cun memia pauc moviment sin 70%. Sche quels trends cuntinueschan, na vegn questa finamira betg cuntanschida, accentuescha l'autura dal studi ed experta da la WHO Regina Guthold.

audio
Per tadlar curt e cumpact
ord Novitads dals 22.11.2019.
laschar ir. Durada: 1 minuta 10 Secundas.

RR novitads 06:00

Artitgels legids il pli savens