Restanzas da pesticids vegnan avant fitg savens en il terren en Svizra. Quai mussa ina retschertga naziunala da la staziun da perscrutaziun Agroscope. Intercurids èn latiers vegnids 100 ers e champs da legums che vegnan cultivads a moda biologica, convenziunala u cun semenza directa. Ils terrens èn vegnids controllads sin 46 divers pesticids. En tut ils lieus han ils scienziads chattà restanzas da pesticids.
Pesticids daditg scumandads
Surstar fetschia surtut ch'i saja vegnì chattà er restanzas da pesticids che na dastgan gnanc pli vegnir duvrads en Svizra, ha declerà Marcel van der Heijden, il manader da la gruppa da perscrutaziun envers l'agentura da novitads Keystone-SDA. Sco exempel ha el numnà Atrazin che na dastga dapi il 2007 betg pli vegnir duvrà.
Ch'ins haja chattà restanzas da fin a 16 pesticids en terren che vegnia gia pli ditg cultivà a moda biologica mussia, ch'i dovria fitg ditg per decumponer pesticids – per part er pli ditg che quai ch'ils tests da labor mussian. Sche e quant ferm che quellas restanzas influenzeschan l'ecosistem e la sanadad dal terren n'è dentant anc betg enconuschent. A quella dumonda vul Agroscope sa deditgar sco proxim.
