Candidats e candidatas ch’han in num che tuna ester survegnan en media 5% damain vuschs che persunas ch’han in num tipicamain svizzer sin la medema glista electorala. Quai mussa in nov studi ch’è avant maun a la «SonntagsZeitung». Pli dretg ch’ina partida politiseschia e pli marcant che quest fenomen saja.
Tenor studi mettan ils funcziunaris da las partidas era persunas cun ragischs estras pli savens sin ils ultims plazs da las glistas. Tras quai vegnian lur schanzas da vegnir elegidas reducidas. Persunas immigradas che candideschian na vegnian uschia betg mo discriminadas dals electurs, mabain er indirectamain dals directoris da las partidas, di Daniel Auer, politolog a l’Universitad da Turin e cunautur dal studi. Ina da las consequenzas saja che persunas immigradas sajan sutrepreschentadas en la politica svizra.
Per il studi han ils auturs dal studi analisà las elecziuns parlamentaras en passa 20 vischnancas svizras dals onns 2006 fin 2018.
