Ulteriurs 4% veglian tenor il studi sa laschar vaccinar fin la fin da l’onn. Dals ulteriurs medis e medias desistan intgins da la vaccinaziun, perquai ch’els sajan guarids da Covid-19. Il pli aut saja la quota da vaccinar tar medis e medias che lavurian en l’ospital. In zic pli bassa saja ella tar medis e medias da chasa.
15% dals medis e medias han gì corona
Sur la media saja er la cumpart dals medis guarids e medias guaridas. Là muntia la quota a 15%. Tar l’entira populaziun muntia ella ad 8%. La raschun saja che medias e medis sajan pli exponids al risico d’infecziun. S'augmentà saja il davos onn era la chargia da lavur ed il stress sco era la malcuntentientscha dals dumandads. Quai possia er avair da far cun la pandemia, quai na saja dentant betg sa cumprovà.
Dapli che duas uras a di documentaziun
La retschertga saja gia vegnida fatga per la 10avla giada. L'equiliber da lavurar e viver haja il davos onn patì fermamain. Quai che creschia significantamain saja la lavur da documentaziun. Cura ch'ins haja fatg l'emprima retschertga il 2011 fin oz saja il temp per documentaziun creschì per 36 minutas a di. Oz dovria in medi u ina media dapli che duas uras a di per questa lavur. Quest trend stoppia vegnir interrut.
