Er sche la maioritad dals uffants e giuvenils sa sentia atgnamain segir en famiglia, scola, temp liber e domicil, saja quest sentiment da segirtad tar 15% dals uffants be mediocher u insumma betg avant maun, scriva UNICEF.
Uschia han 32% dals uffants inditgà dad esser confruntà en scola cun violenza fisica e 42% violenza psichica. En l'internet è questa cumpart tar 32%. Vitiers èn 41% dals uffants stads almain ina giada exposts a discriminaziun. Er a chasa è violenza tar mintga terz uffant realitad.
Uffants en povradad èn pli periclitads
Dus terz dals uffants vegnan chastiads en la famiglia (65%), en scola èn quai anc 35%. Uffants ch'èn pertutgadas da povradad èn en general exponids ad in pli grond ristg da violenza ed experientschas da chastis.