Siglir tar il cuntegn
Inhalt

Svizra Success per program da scolar migrants a tgirunzs

Dapi l’entschatta dal project avant trais onns hajan 616 persunas prendì part a la scolaziun. 444 persunas hajan terminà la scolaziun cun success e quasi 90% haja chattà ina plazza, scrivan il Secretariat statal per migraziun e la Crusch cotschna.

Purtret d'in um che mesira il puls d'ina persuna.
Legenda: La scolaziun da tgirunz per migrants e fugitivs è stà in success. Keystone

Il project avev'ins lantschà avant trais onns, cun la finamira da simplifitgar a migrants, fugitivs e fugitivs admess provisoricamain d'entrar sin il martgà da lavur en il sectur da tgira. Ils participants vegnan sustegnids d'absolver la scolaziun sco tgirunz, quai per exempel cun curs da lingua, cun agid per emprender e cun agid per tschertgar ina plazza. La scolaziun consista da 120 lecziuns teoria ed in praticum.

Dapi l'entschatta da la scolaziun han 616 persunas fatg part dal project «Sesam». Radund la mesadad dad els èn fugitivs u fugitivs admess provisoricamain, trais quarts èn dunnas. 444 participants han entant finì lur scolaziun cun success. Enfin la terminaziun dal project la fin da quest onn, vegnan quai ad esser passa 500 persunas.

Dumandads sin il martgà da lavur

Prest 90% dals participants han suenter er chattà ina plazza. Il rest sa chatta per gronda part anc en la scolaziun. La quota da persunas che han chalà la scolaziun saja stada pitschna, quai sur tut grazia ad ina selecziun fitg stricta dals candidats. Radund in terz dals interessads n'hajan ins gnanc laschà far la scolaziun, en ils pli blers cas per mancanza d'enconuschientschas da lingua.

Il Secretariat statal per migraziun è sa participà cun 1 milliun francs al project, quai correspunda a la mesadad dals custs. La fin da l'onn vegn il project terminà, la purschida resta dentant: Fugitivs e migrants pon vinavant far la scolaziun cun sustegn. Mintg'onn vegnian quai ad esser radund 100 fin 200 persunas. En l'entira Svizra èsi en tut radund 4'000 persunas che fan la scolaziun da tgirunzas e tgirunzs.

RR novitads 16:00