Albert Rösti è vegnì elegì cun 131 da 243 vuschs en l'emprim scrutini. Hans-Ueli Vogt ha survegnì 98 vuschs. 14 vuschs èn idas a diversas persunas.
En ses discurs en quatter linguas – tranter auter er per rumantsch – ha Rösti intunà l'independenza e l'unitad da la Svizra. El ha engrazià a ses collegas e spezialmain a sia famiglia per il grond sustegn. El cumenzia ses nov uffizi cun respect, ma er cun grond schlantsch.
Crimi tar l'elecziun da la candidata da la PS
Tar la segunda elecziun hai duvrà dapli ch'in scrutini. En l'emprim scrutini ha Elisabeth Baume-Schneider survegnì 96 vuschs, Eva Herzog 83 e Daniel Jositsch, che n'era betg vegnì nominà da la fracziun, 58 vuschs.
Er en il segund scrutini n'ha puspè nagin cuntanschì la maioritad absoluta da 123 vuschs. Elisabeth Baume-Schneider ha fatg las pli bleras vuschs cun 112. Eva Herzog ha survegnì 105 vuschs e Daniel Jositsch anc 28.
En il terz scrutini è lura vegnida elegida Elisabeth Baume-Schneider cun precis 123 vuschs da 245. Eva Herzog ha fatg 116 e Daniel Jositsch 6 vuschs.
In favurit ed ina surpraisa
Albert Rösti valeva avant las elecziuns sco favurit. L'agronom è in routinier en il Cussegl naziunal ed ha ina buna rait – tranter auter er tras ses presidi da la PPS dal 2016 fin il 2020. Plinavant vegn el er stimà dad adversaris politics.
L'elecziun dad Elisabeth Baume-Schneider è dentant ina pitschna sensaziun. Eva Herzog da Basilea-Citad valeva sco favurita. Sco directura da finanzas dal chantun Basilea-Citad ha ella blers onns experientscha en l'executiva ed era pli enconuschenta – cunzunt en la Svizra tudestga.
Baume-Schneider è pir cun sia candidatura per il Cussegl federal vegnida enconuschenta al public. La figlia da purs sa chapescha bain cun puras e purs – ina lobi che n'è betg da sutvalitar. Ella vala sco amiaivla, cordiala e nuncumplitgada. Sco anteriura directura d'educaziun dal chantun Giura ha ella er blera experientscha executiva.
Rösti e Baume-Schneider entran en uffizi il prim da schaner 2023.
Suenter l'elecziun sa midan bleras chaussas en la vita dals nov-elegids. Tranter auter ston els dar giu lur telefonin, dastgan dentant era eleger in auto. Tar quellas chaussas ed anc bleras autras gida la Chanzlia federala.
