La cumissiun da recrutaziun da la PPS aveva examinà las tschintg candidaturas, e chattà che tuttas sajan qualifitgadas ed elegiblas. Perquai aveva ella recumandà che la fracziun elegia in ticket da dus.
La fracziun ha elegì venderdi saira Albert Rösti e Hans-Ueli Vogt. Rösti saja vegnì elegì en l'emprim scrutini, ha ditg il president da la fracziun Thomas Aeschi en la conferenza da pressa suenter las elecziuns. La segunda nominaziun saja stada main clera, Vogt haja pir gudagnà cunter Werner Salzmann en il quart scrutini cun 26 cunter 25 vuschs.
Naginas grondas surpraisas
La nominaziun dad Albert Rösti n'è betg ina surpraisa. El vala sco favurit per la successiun dad Ueli Maurer. Il Bernais è agronom, ha 55 onns e politisescha dapi l'onn 2011 en il Cussegl naziunal. Dal 2016 fin il 2020 ha el presidià la PPS svizra.
Er Hans-Ueli Vogt da Turitg valeva sco in favurit per vegnir nominà. El è vegnì nominà da la pli gronda fracziun da la partida. Il giurist da 53 onns è anteriur cusseglier naziunal.
L'elecziun da l'assamblea naziunala per il successur d'Ueli Maurer è ils 7 da december.
Ils candidats e la candidata betg sin il ticket
- Werner Salzmann, cusseglier dals chantuns da Berna
- Heinz Tännler, cusseglier guvernativ da Zug
- Michèle Blöchliger, cussegliera guvernativa da la Sutsilvania
Salzmann en il duo bernais
Sco emprim insumma era Werner Salzmann siglì sin il carussel da candidats. El haja studegià las pretaisas per la plazza e saja vegnì a la conclusiun ch'el saja qualifitgà, ha el annunzià ils 7 d'october. Il cusseglier dals chantuns bernais ha 59 onns ed è expert tar l'administraziun da taglia dal chantun Berna. El è main enconuschent sur ils cunfins dal chantun Berna ora, vala dentant sco politicher engaschà e cumpetent.
Tännler cun paucas schanzas
El veglia dar ina schelta a la partida, ha Heinz Tännler ditg cura ch'el ha annunzià sia candidatura. Dapi l'onn 2007 è l'advocat e notar da 62 onns cusseglier guvernativ dal chantun Zug. Ses handicap è ch’el ha crititgà publicamain las sancziuns da la Svizra cunter la Russia. Per ina gronda part dal Parlament federal n'è el perquai betg elegibel.
Blöchliger sco suletta dunna
Suenter ch'ina dunna suenter l'autra ha renunzià, è stada cun Michèle Blöchliger ina cussegliera guvernativa a disposiziun. La dunna da 55 onns fa dapi l'onn 2018 part a la regenza dal chantun Sutsilvania ed è ministra da finanzas. Cun ella fiss il chantun represchentà per l'emprima giada insumma en il Cussegl federal. La cuntraversa pervia da sia naziunalitad dubla svizra e britannica ha sbassà marcantamain sias schanzas.
