Ignazio Cassis è vegnì elegì cun 125 da 244 vuschs valaivlas. L'elecziun è succedida senza disturbis, quai aifer in zic dapli ch'ina ura. Tut las fracziuns avevan annunzià ch'ellas respectian il ticket da trais che la PLD aveva decis. Sin quel valeva il cusseglier naziunal tessinais da 56 onns sco favurit.
Maudet è stà il pli ferm concurrent
Sco pli ferm concurrent è sa mussà il Genevrin Pierre Maudet. Il cusseglier guvernativ da 39 onns ha survegnì 62 vuschs en il prim scrutini, en il segund 90. Quellas dastgassan surtut esser vegnidas dal center-sanester. Dal pli absolut da 123 vuschs è Maudet però stà lunsch davent.
Er la cussegliera naziunala dal Vad Isabelle Moret n'ha betg pudì tegnair pitg a Cassis. En l'emprim scrutini ha ella bain anc survegnì 55 vuschs, en il segund era ella però lunsch a la cua cun 28 vuschs. Sustegn ha Moret survegnì dals Verds, er bleras dunnas dastgassan avair vuschà per ella.
Jau ma met a disposiziun sco fravi per buglir ensemen anc pli fitg noss pajais.
«En il num da Tessin, Grischun talian e l'entir'italianità …»
Curt suenter il segund scrutini ha Cassis declerà avant l'Assamblea federala ch'el acceptia l'elecziun, quai en tut las quatter linguas svizras. Silsuenter è el vegnì saramentà. Il resultat da l'elecziun mussia per el la veglia da vulair rinforzar il spiert da cuminanza dal pajais. «Jau ma met a disposiziun sco fravi che vul anc buglir ensemen pli fitg noss pajais», ha ditg il nov cusseglier federal. Ignazio Cassis è l'emprim cusseglier federal dapi la demissiun da Flavio Cotti il 1999.
Departaments vegnan repartids ils proxims dis
La sesida, nua ch'ils departaments vegnan repartids è ils proxims dis. Il gremi sa raduna venderdi che vegn. Schebain ils departaments vegnan gia repartids en questa sesida, decida la presidenta da la Confederaziun Doris Leuthard.
Qua la survista dals eveniments principals da l'elecziun.
Il ticker è a fin
-
10:38
Er Isabelle Moret s'exprima
Cun sia decisiun haja il parlament dà dapli pais a la derivanza che a la schlattaina, ha ditg la candidata dal chantun Vad. Dentant saja gia in progress per ils dretgs da las dunnas ch'ella haja candidà sco dunna e mamma.
-
10:30
Gronda dischillusiun tar Pierre Maudet
Il concurrent per il sez en il Cussegl federal ha ditg che la dischillusiun saja stada uschè gronda sco ses engaschi per il cumbat electoral.
-
10:26
«Viva il Ticino!»
Ils aderents dad Ignazio Cassis festiveschan «lur» nov cusseglier federal.
-
10:22
Il nov cusseglier federal quadriling
En ses pled è Ignazio Cassis er sa drizzà als Rumantschs.
-
9:55
Il nov Cussegl federal
Legenda: Il Cussegl federal è puspè cumplet. SRF -
9:28
«Io giuro!»
- Ignazio Cassis vegn saramentà.
- Suenter 18 onns survegn il Tessin puspè in cusseglier federal.
- La president da la Confederaziun Doris Leuthard beneventa il nov collega d'uffizi.
- L'ultim cusseglier federal tessinais è stà Flavio Cotti da la PCD. Cotti era sa retratg il 1999.
-
9:21
Ignazio Cassis accepta elecziun
Il nov elegì cusseglier federal prenda il pled. Quai en tut las linguas naziunalas. El veglia buglir ensemen anc pli fitg il pajais. Plinavant ha el cità la socialista Rosa Luxemburg.
Legenda: Ignazio Cassis. Keystone -
9:17
Ignazio Cassis è elegì
Gia il segund scrutini porta la decisiun. Il cusseglier naziunal dal Tessin ha survegnì 125 vuschs. Necessari eran 123 vuschs.
Segund scrutini
vuschs Ignazio Cassis 125 Isabelle Moret 48 Pierre Maudet 90 -
8:58
Ignazio Cassis dominescha l'emprim scrutini
Ignazio Cassis ha manchentà la maioritad absoluta da 122 vuschs be per 13 vuschs. Il segund scrutini pudess gia purtar la decisiun. Ils dumbravuschs repartan puspè ils cedels electorals.
Emprim scrutini
vuschs Ignazio Cassis 109 Isabelle Moret 55 Pierre Maudet 62 Divers 16 -
8:36
L'emprim scrutini cumenza
Ils dumbravuschs repartan ils cedels electorals.
Legenda: Ils cedels electorals vegnan repartids. L'emprim scrutini cumenza. SRF -
8:32
Decleranzas da la fracziun da la PLD
- Il president dal Cussegl naziunal Jürg Stahl supplitgescha il Cussegl federal da bandunar la sala.
- I suondan las las decleranzas da las fracziuns. Questas n'èn betg obligatoricas, ma vegnan duvradas per exprimer las opiniuns.
- Il vicepresident da la fracziun Beat Walti prenda il pled. Tut ils trais candidats sajan qualifitgads per l'uffizi.
-
8:27
Ovaziuns dal parlament per il cusseglier federal partent
- Didier Burkhalter tegna ses pled da cumià.
- «Prender cumià è in zic sco murir», uschia Burkhalter.
- El engrazia a tuts ch'han accumpagnà el sin quest viadi.
-
8:13
L'Assamblea federala prenda uffizialmain cumià da Didier Burkhalter
- Il president dal Cussegl naziunal Jürg Stahl avra la sesida da l'Assamblea federala.
- Stahl regorda dals merits da Didier Burkhalter.
- Didier Burkhalter sa retira suenter otg onns en uffizi ils 31 d'october 2017.
- El è stà parsura dal Departament federal d'affars exteriurs (EDA).
Legenda: Il Cussegl federal prenda cumià da ses collega. Keystone -
7:55
Ignazio Cassis sin via en Chasa federala
-
7:50
Tgi succeda a Didier Burkhalter?
- L'Assamblea federala elegia la successura u il successur dal cusseglier federal Didier Burkhalter.
- La PLD ha nominà trais candidats: Ignazio Cassis (TI), Isabelle Moret (VD) e Pierre Maudet (GE).
- Cler favurit è il cusseglier naziunal tessinais Ignazio Cassis.
- L'emprim scrutini cumenza enturn las 09:00 e dura ca. 20 minutas.
audioELEC CF: Situaziun da partenzaord Actualitad dals 20.09.2017.laschar ir. Durada: 51 Secundas.
RR novitads 06:00++