La cussegliera naziunala dal chantun Vad – Jacqueline de Quattro – na vul betg daventar presidenta da la Partida liberaldemocratica. Ella haja decidì quai suenter lungas ponderaziuns. Quai ha ella ditg en ina intervista cun las gasettas da Tamedia.
Jacqueline de Quattro argumentescha sia decisiun cun raschuns da la politica regiunala e raschuns persunalas. Tranter auter spetgia la Svizra franzosa sco proxima ina persuna da la Svizra tudestga a la testa da la partida. Da s’engaschar sco vicepresidenta da la PLD n’excluda de Quattro però betg.
Er Damian Müller na vul betg surpigliar presidi
Il cusseglier dals chantuns da Lucerna, Damian Müller, na vul betg daventar nov president da la Partida liberaldemocratica. El veglia far ina fin a las speculaziuns ed annunzia perquai explicitamain ch’el desistia d’ina candidatura, ha communitgà Müller via Twitter. El veglia dentant vinavant s’engaschar cun tutta forza per il chantun da Lucerna sco cusseglier dals chantuns.
Per Marcel Dobler vegn be il co-presidi en dumonda
Per la successiun da Petra Gössi datti cun quai vinavant be in candidat: il cusseglier naziunal songagliais Marcel Dobler. El veglia dentant be daventar co-president. Per l'ina pervi da motivs da temp e per l'autra pervi da sias enconuschientschas da franzos.
Ils 15 d’avust scada il termin per candidar.
