Gia la primavaira da l'onn passà, cura ch'il cusseglier federal Didier Burkhalter aveva annunzià sia demissiun, era Martin Schmid vegnì numnà. Per ils parlamentaris grischuns fiss el gia lura stà in candidat cun il profil per in cusseglier federal sco ch'els avevan respundì a la dumonda da RTR.
Uss sa repeta la situaziun: Puspè demissiunescha in cusseglier federal e puspè cursescha il num dal cusseglier naziunal grischun Martin Schmid sco candidat pussibel per la successiun da la PLD en il Cussegl federal.
Martin Schmid sez dentant haja anc betg decis, sch'el veglia candidar. El na sa lascha betg guardar en las chartas:
I dat 246 parlamentaris e la probabilitad ch’i vegn lura numnà ina giada in num è tgunsch pussaivla.
Cura ch’el sa decida è anc avert.
Martin Schmid senta dentant era il squitsch da la partida da preschentar ina dunna sco successura da Johann Schneider-Ammann. Il num cità actualmain il pli savens è quel da Karin Keller-Sutter, la presidenta dal Cussegl dals chantuns.
Auters nums ord la PLD
Sper Keller-Sutter vegnissen en dumonda era las cusseglieras naziunalas Daniela Schneeberger (BL), Regina Sauter (ZH), Christa Markwalder (BE) e Doris Fiala (ZH). Vinavant pudessan era las cusseglieras guvernativas Carmen Walker Späh (ZH), Petra Steimen-Rickenbacher (SZ), Barbara Schär (UR), Yvonne von Deschwanden (NW) u Maya Büchi (OW) valair sco candidatas.
Sin dumonda, sch'ina dunna vegnia a succeder el ha respundì Schneider-Ammann: «Natiralmain faschess quai bain a la partida».
RR novitads 17:00+
